O‘ZBEKISTONDA INVESTITSIYALARNI MOLIYALASHTIRISH MANBALARINI DIVERSIFIKATSIYA QILISH

Abstract

Mazkur tezisda O‘zbekistonda investitsiyalarni moliyalashtirish manbalarini diversifikatsiya qilishning ahamiyati va zamonaviy tendensiyalari tahlil qilingan. Tadqiqotda investitsiyalarni moliyalashtirishda korxonalarning o‘z mablag‘lari, bank kreditlari, davlat budjeti mablag‘lari, to‘g‘ridan-to‘g‘ri xorijiy investitsiyalar va xalqaro moliya institutlari resurslarining o‘rni ko‘rib chiqilgan. Shuningdek, investitsiya faoliyatining barqarorligini ta’minlashda kapital bozori, davlat-xususiy sheriklik, obligatsiyalar va boshqa muqobil moliyalashtirish instrumentlaridan foydalanish imkoniyatlari o‘rganilgan. Tahlil natijalari O‘zbekistonda investitsiya resurslari tarkibida xorijiy investitsiyalar va kreditlarning ahamiyati ortib borayotganini, shu bilan birga ichki moliyalashtirish manbalarini kengaytirish va uzoq muddatli moliyaviy instrumentlardan foydalanishni rivojlantirish zarurligini ko‘rsatadi. Tadqiqot yakunida investitsiyalarni moliyalashtirish manbalarini diversifikatsiya qilish, xususiy kapitalni kengroq jalb etish va moliya bozorining investitsion imkoniyatlarini oshirish bo‘yicha takliflar ishlab chiqilgan.